Fréttir

Verðlaunafénu deilt jafnt á alla keppendur Players mótsins
Hideki Matsuyama.
Ísak Jasonarson
Ísak Jasonarson skrifar
föstudaginn 13. mars 2020 kl. 19:56

Verðlaunafénu deilt jafnt á alla keppendur Players mótsins

Það hefur líklega ekki farið framhjá mörgum að Players mótinu á PGA mótaröðinni var aflýst stuttu eftir að kylfingar kláruðu fyrsta hring mótsins á fimmtudaginn.

Hideki Matsuyama byrjaði manna best í mótinu en hann jafnaði vallarmetið á TPC Sawgrass vellinum á fyrsta keppnisdegi þegar hann kom inn á 9 höggum undir pari. Matsuyama var með tveggja högga forystu á næstu kylfinga og líklegur til að vinna sitt sjötta mót á PGA mótaröðinni.

Matsuyama verður hins vegar að bíða aðeins lengur eftir þeim áfanga en hann fær jafn hátt verðlaunafé og neðsti maður mótsins. Þetta staðfesti framkvæmdastjóri mótaraðarinnar, Jay Monahan, á föstudag en helmingi verðlaunafé mótsins verður deilt jafnt niður á alla keppendur.

Alls voru 15 milljónir dollara í húfi í heildina og var því 7,5 milljónum deilt niður á 144 keppendur sem gera 52.083 dollara á leikmann.

Ljóst er að verðlaunafé mótsins skiptir litlu máli í stóra samhenginu en óvíst er hvenær leikið verður næst á PGA mótaröðinni. Nú þegar er búið að fresta næstu mótum, þar á meðal Masters mótinu.