Wolff og Hovland gerast atvinnumenn
Tveir bestu áhugakylfingar síðustu ára, Viktor Hovland og Matthew Wolff, tilkynntu í vikunni að þeir ætluðu að gerast atvinnukylfingar nú stuttu eftir að háskólagöngu þeirra í Bandaríkjunum er lokið.
Báðir léku þeir með Oklahoma State skólanum og áður en þeir gerðust atvinnumenn voru þeir í efstu tveimur sætum heimslista áhugamanna í golfi.
Hovland sigraði á Opna bandaríska áhugamannamótinu og var efsti áhugakylfingurinn á Masters mótinu í apríl.
Wolff hefur nú þegar leikið á mótum á PGA mótaröðinni en hann var valinn kylfingur ársins í háskólagolfinu eftir að hafa unnið NCAA meistaramótið.
Fyrsta mót strákanna sem atvinnumenn verður á Travelers Championship mótinu eftir tvær vikur.