Woods lék fyrsta hringinn á 69 höggum
Gestgjafinn Tiger Woods lék í gær fyrsta hringinn á Genesis Invitational mótinu á 2 höggum undir pari og er jafn í 17. sæti af 120 kylfingum. Einungis 41 kylfingur lék undir pari á fyrsta keppnisdegi á hinum frábæra Riviera golfvelli í Los Angeles.
Woods fór af stað með látum í mótinu en hann fékk örn strax á fyrstu holu. Woods sló þá annað höggið sitt inn á flöt á par 5 holu og setti niður frekar langt pútt fyrir erninum.
Skorkort Woods á fyrsta hringnum.
Eftir fyrri níu var Woods kominn á fjögur högg undir pari en honum fataðist aðeins flugið á seinni níu sem hann lék á 2 höggum yfir pari.
Eftir fyrsta hringinn er Woods fimm höggum á eftir Matt Kuchar í efsta sætinu en einungis tveimur höggum frá öðru sætinu.