Andri Már reyndi fyrir sér á úrtökumóti í Frakklandi

Andri Már Óskarsson úr Golfklúbbi Hellu reyndi fyrir sér í fyrsta skipti á úrtökumóti fyrir DP Evrópumótaröðina í golfi en komst ekki í gegnum niðurskurðinn. Andri lék á Golf d’Hardelot golfvellinum í Frakklandi og endaði á sjö höggum yfir pari og var í 83. sæti.

„Þetta var bara gaman og aldrei að vita að maður reyni aftur á næsta ári,“ sagði Andri í spjalli við kylfing.is að loknum þriðja hring á mótinu.

Andri lék fyrsta hringinn á 73 höggum, annan á 76 og þriðja hringinn á einu höggi undir pari eða 70 höggum.

„Þetta byrjaði ágætlega en ég fékk vott af matareitrun fyrir annan hringinn og gat því ekki borðað áður en ég fór út á golfvöll, lék þá á +5. Lék mjög vel síðasta hringinn. Þetta var góð reynsla og ég gæti alveg hugsað mér að reyna aftur.“

Eitthvað sérstakt sem þú tekur út úr þessari þátttöku. Hvað vantaði upp á til að komast lengra?

„Þetta er alltaf spurning um stutta spilið. Það skiptir svo miklu máli. Þá var pútterinn ekki mjög heitur,“ sagði Andri Már Óskarsson.