Aron í 3. sæti á fyrsta Nordic mótinu - góð frammistaða Íslendinganna
Aron Júlíusson úr GKG endaði jafn í 3. sæti á Bravo Tours Open mótinu á Nordic mótaröðinni sem lauk í gær. Sigurður Arnar Grétarsson og Hlynur Bergsson, báðir úr GKG stóðu sig einnig vel á mótinu.
Aron var um tíma í forystusætinu en náði sér ekki á strik á lokahringnum sem hann lék á tveimur yfir pari eftir að hafa leikið fyrstu tvo hringina á samtals 11 undir, 66 og 67 höggum.
Sigurður Arnar endaði mótið á þremur undir pari 71-69-69 höggum og varð jafn í 13. sæti.
Hlynur Bergsson var í forystu eftir frábæran fyrsta hring á 66 höggum, sex undir pari en lék næstu tvo á 72-73 og endaði á -5 og jafn í 26. sæti.
Hákon Örn Magnússon úr GR var einnig meðal þátttakenda en hann komst ekki í gegnum niðurskurðinn eftir tvo hringi á pari, 72-72.
Þeir félagar eru allir skráðir í annað mót ársins á Nordic mótaröðinni nema Aron Snær en mótið verður um næstu helgi.
Nordic mótaröðin er þriðja sterkasta mótaröðin í Evrópu og gefur möguleika á að komast inn á Áskorendamótaröðina en þar eru Guðmundur Á. Kristjánsson og Haraldur Franklín Magnús með þátttökurétt.
Sýnt var frá lokadegi mótsins á Youtube.
