Fannar Ingi sigraði Hákon og fagnaði Íslandsmeistaratitlinum

Fannar Ingi Steingrímsson úr Golfklúbbi Hveragerðis varð í dag Íslandsmeistari í holukeppni í flokki 15-16 ára. Fannar og Hákon Örn Magnússon úr Golfklúbbi Reykjavíkur áttust við í úrslitaleiknum og þar sigraði Fannar nokkuð örugglega 5/3.

Kristján Benedikt Sveinsson úr Golfklúbbi Akureyrar sigraði Arnór Snæ Guðmundsson úr Golfklúbbnum Hamri á Dalvík í leiknum um þriðja sætið 5/4.

Öll úrslit úr þessum flokki má sjá hér:

Í undanúrslitum mættust Fannar og Kristján þar sem sá fyrrnefndi sigraði í hörkuleik 2/1. Hákon og Arnór áttust við í hinni undanúrslitaviðureigninni og þar réðust úrslitin á lokaholunni þar sem Hákon hafði betur 1/0.

Henning Darri Þórðarson úr Keili sem sigraði á tveimur fyrstu mótunum á Íslandsbankamótaröðinni fékk frávísun eftir höggleikskeppnina á föstudaginn. Hann skrifaði undir skorkort sem var ekki rétt skráð og fékk Henning því ekki að taka þátt í 16 manna úrslitum keppninnar.

Hákon Örn Magnússon úr GR horfir hér á eftir upphafshögginu á 3. braut á Urriðavelli í dag.