Góð frammistaða í fyrsta mótinu hjá Íslandsmeistaranum
Dagbjartur Sigurbrandsson endaði í 11. sæti á sínu fyrsta móti á Nordic mótaröðinni sem fram fór í Esbjerg í Danmörku í vikunni. Hlynur Bergsson sem hefur leikið í flestum Nordic mótum af íslensku kylfingunum endaði jafn í 31. sæti en hann vann mót á mótaröðinni fyrr í sumar.
Dagbjartur lék 54 holurnar á pari í mótinu 67-71-75 en Hlynur var á fjórum yfir, 71-72-74. Hann er í 30. sæti á stigalistanum. Hákon Örn Magnússon var einnig meðal þátttakenda en komst ekki í gegnum niðurskurðinn eftir tvo hringi á 71-75.
