Golfvöllur er sundlaug

Í ljósi mikilla viðbragða á  spjallinu hér á Kylfingur.is við fyrstu grein Margeirs Vilhjálmssonar höfum við ákveðið að birta aðra grein þar sem hann er með hugmyndir um hvernig megi  nálgast greiðslur fyrir afnot af golfvöllum. Þar segir pistlahöfundur m.a. að allir krakkar á grunnskólaaldri ættu að fá eina kennslustund í viku í golfi alveg eins og í sundi.  "Fáum rekstrarstyrki fyrir golfvellina til jafns við sundlaugarnar í hverju bæjarfélagi og umfram allt fáum að greiða sambærilegt gjald fyrir afnotin."

Hér á eftir fer pistill Margeirs:
"Við höfum státað okkur af því að á Íslandi sé golf almenningsíþrótt.  Skoðanakannanir hafa ítrekað sýnt að yfir 30.000 manns spila golf 5 sinnum eða oftar á ári.  Þvílík þátttaka.  Á Íslandi eru um 192 golfholur á hverja 100.000 íbúa, sem er eitt af okkar betri heimsmetum.  Þetta er annað en eins og Þýskalandi, Frakklandi og fleiri stórum löndum þar sem einungis þeir efnameiri hafa efni á að stunda þessa góðu íþrótt.

Hvað þýðir það að vera almennings? 
Hlaup er talið almenningsíþrótt, líka sund.  Ég held að stangarstökk sé það ekki.  Eða kúluvarp.  Allavega er talað um golf og sund sem almenningsíþróttir.  Gott mál það.  Nema það er smá verðmunur.  Nonni nágranni sem er formaður sundfélagsins þarf ekki að afla fjár eða greiða félagsgjöld til að reka sundlaugina.  Sveitarfélagið sér um það.

Ef höfuðborgin er tekin sem dæmi, þá rekur Íþrótta- og tómstundaráð Reykjavíkur (ÍTR)  sjö sundlaugar.  Árstekjur vegna þeirra eru um 500 mkr. en gjöldin um 1.250 mkr.  Rekstrarstyrkur til hverrar laugar á ári þarf því að vera um 100 mkr. á ári, (u.þ.b. 8 mkr. á mánuði)  til að ná pari.  Heimsóknir í sundlaugarnar eru um 1,7 milljónir á ári.  Deilt niður á sjö sundlaugar gerir það um 250.000 heimsóknir í hverja laug á ári. 

Ef gert er ráð fyrir að hver gestur eyði að meðaltali 1 klst í sundi í hvert skipti ætti það að duga til að synda 2 til 10 ferðir, spjalla við félagana í pottinum um golf og koma gufusoðinn uppúr.  Þannig mælt eru nýtingarklukkustundir sundlaugar á ári alls 250.000.  Því er deilt á 12 mánuði, alls um 21.000 nýtingarklukkustundir á mánuði. 

Golfvellirnir á höfuðborgarsvæðinu fá um 30.000 heimsóknir hver á ári.  Þeir eru opnir svona gróft til tekið frá 1. maí til 1. október eða í 5 mánuði. (Vetrargolf ekki talið með).  Hver heimsókn kylfings á völlinn er væntanlega að meðaltali um 3,5 klukkustundir. Gróft mat. Einhverjir spila bara 9 holur, aðrir 18, aðrir meira.  Það þýðir að nýtingarklukkustundir 18 holu golfvallar eru um 105.000 á ári, deilt niður á 5 mánuði sem alls gerir 21.000 nýtingarklukkustundir á mánuði.  Því er golfvöllur sundlaug.  Sá munur er hinsvegar á að ekki fást 8 milljónir í rekstrarstyrk fyrir hvern völl á mánuði yfir sumartímann.  Eru margir ef einhver golfvöllur á landinu sem fær 40 mkr. (5 mán x 8 mkr) rekstrarframlag frá sínu sveitarfélagi?  Það væri líka forvitnilegt að vita hversu margir myndu mæta í sund, ef greiða þyrfti ígildi eins félagsgjalds fyrir ársaðgang

Í þessu er sóknarfæri fyrir golf á Íslandi.  Markmiðið á að vera að setja golf á sama stall og sund.  Það er fjöldi efnilegs fólks sem hefur nýlokið námi eða er í námi í golfkennaraskólanum.  Þau þurfa verkefni – ekki koma allir til með að geta staðið á mottunni og kennt einkakennslu fyrir 2.500 kr á mann í hálftíma í Básum eða í Hraunkoti.   Allir krakkar á grunnskólaaldri ættu að fá eina kennslustund í viku í golfi alveg eins og í sundi.  Fáum rekstrarstyrki fyrir golfvellina til jafns við sundlaugarnar í hverju bæjarfélagi og umfram allt fáum að greiða sambærilegt gjald fyrir afnotin.

Nú er lag fyrir Golfsambandið að taka til hendinni og leiða klúbbana áfram í metnaðarfullri áætlun.  Við höfum kannski fengið aðeins of lengi að sitja efst á öldu góðærisins og þurft að sýna litla hugmyndaauðgi til að koma góðri íþrótt enn frekar á framfæri.

Golf er almenningsíþrótt, eða hvað?"

Með golfkveðju,
Margeir Vilhjálmsson.