Guðrún Brá á fjórum yfir á fyrsta hring í Hollandi
Guðrún Brá Björgvinsdóttir úr Keili lék fyrsta hringinn á Hollenska mótinu sem hófst í dag á fjórum yfir pari en leikið er á Goyer golfsvæðinu í Hollandi.
Guðrún fékk tvo skolla og einn tvöfaldan skolla á hringnum og náði ekki fuglum til að bæta skorið og er þegar þetta er skrifað í kringum 90. sætið. Hún þarf að bæta sig verulega í næsta hring til að eiga möguleika á að komast í gegnum niðurskurðinn.
Guðrún er ekki með þátttökurétt á LET, Evrópumótaröðinni sem er sú sterkasta í Evrópu en er með þátttökurétt á LET Access röðinni, þeirri næstu fyrir neðan. Hún komst þó inn á þetta mót og vonast til að fá fleiri tækifæri á LET.
