Herbert sigraði í fyrsta sinn
Ástralinn Lucas Herbert vann í gær sinn fyrsta sigur á PGA mótaröðinni þegar hann sigraði á Butterfield Bermuda Classic.
Aðstæður á Port Royal golfvellinum voru gríðarlega erfiðar í gær þar sem mikill vindur og rigning gerði keppendum erfitt fyrir.
Kanadamaðurinn Taylor Pendrith sem leiddi fyrir lokadaginn réði ekki við aðstæður og fékk ekki einn einasta fugl í gær og lék á 76 höggum. Við það féll hann niður í 5. sæti mótsins ásamt Scott Stallings. Stallings lék stórkostlegt golf í gær og átti langbesta hring dagsins 62 högg. 14 högga sveifla á milli þeirra Stallings og Pendrick í gær.
Sigurvegarinn Herbert lék öruggt golf og kom inn á 69 höggum, fékk fjóra fugla og tvo skolla. Það dugði til eins höggs sigurs en Patrick Reed sem sótti hart að efstu mönnum með frábærri spilamennsku í gær endaði í öðru sæti ásamt Danny Lee höggi á eftir Herbert. Reed lék á 65 höggum í gær sem var næst besti hringur dagsins.
Hinn 25 ára gamli Herbert tryggði sér með sigrinum þátttökurétt á PGA mótaröðinni til tveggja ára auk þess sem hann fær boð á Masters mótið í apríl.
