Kemur fyrsti sigur Spieth í tæp fjögur ár í dag?
Bandaríkjamaðurinn Jordan Spieth er með tveggja högga forystu fyrir lokahringinn á AT&T Pebble Beach Pro-Am. Takist honum að sigra á mótinu í dag verður það fyrsti sigurinn hans í tæp fjögur ár.
Þegar Spieth sigraði á Opna mótinu árið 2017 hafði Bandaríkjamaðurinn ungi verið einn besti kylfingur heims í nokkur ár og sigrað á 11 mótum á PGA mótaröðinni og þar af þremur risamótum.
Í dag hefur hann hins vegar ekki sigrað á móti í tæp fjögur ár og átt erfitt uppdráttar á hans mælikvarða. Eitthvað virðist þó hafa breyst í síðustu viku en þá náði Spieth sínum besta árangri á PGA mótaröðinni í 21 mánuð þegar hann endaði í 4. sæti á WM Phoenix Open mótinu.
Góð spilamennska Spieth hefur svo haldið áfram þessa vikuna og leiðir hann eins og fyrr segir með tveimur höggum fyrir lokahringinn á hinum magnaða Pebble Beach velli.
Lokahringur AT&T Pebble Beach Pro-Am mótsins fer fram í dag. Hér er hægt að sjá stöðuna.
Sigrar Jordan Spieth á PGA mótaröðinni:
2013 John Deere Classic
2015 Valspar Championship
2015 Masters Tournament
2015 U.S. Open
2015 John Deere Classic
2015 The Tour Championship
2016 Hyundai Tournament of Champions
2016 Dean & DeLuca Invitational
2017 AT&T Pebble Beach Pro-Am
2017 Travelers Championship
2017 The Open