LPGA: Valdís lék fyrsta hringinn á parinu
Valdís Þóra Jónsdóttir GL hóf í dag leik á úrtökumóti fyrir LPGA mótaröðina. Um er að ræða fyrsta stig úrtökumótanna af þremur.
Valdís lék fyrsta hringinn á pari Dinah Shore vallarins og er þessa stundina jöfn í 23. sæti af þeim 139 kylfingum sem hafa lokið leik á fyrsta keppnisdegi.
Skorkort Valdísar frá fyrsta hringnum má sjá hér fyrir neðan en eins og sést fékk hún þrjá fugla og þrjá skolla á hringnum.
Leikið er á þremur völlum í mótinu og verður skorið niður eftir þrjá hringi. Þeir kylfingar sem halda áfram í gegnum niðurskurðinn leika svo fjórða hringinn og berjast þá um að minnsta kosti 60 laus sæti á næsta stig.
Vellirnir sem keppt er á eru Palmer og Dinah Shore vellirnir hjá Mission Hills golfklúbbnum og Palm Desert völlurinn hjá Shadow Ridge golfklúbbnum en þeir eru allir staðsettir í Kaliforníu. Allir kylfingar mótsins spila einn hring á hverjum velli fyrstu þrjá dagana og þeir sem komast áfram leika lokahringinn á Dinah Shore vellinum.
Annar hringur mótsins fer fram á morgun, föstudag.
