Metfjöldi íslenskra kylfinga í úrtökumótum fyrir Evrópumótaröð karla
Alls taka 11 íslenskir kylfingar þátt í úrtökumótunum fyrir Evrópumótaröð karla á næstu vikum. Aldrei hafa jafnmargir keppendur frá Íslandi skráð sig til leiks í karlaflokki en árið 2016 reyndu átta kylfingar fyrir sér.
Tíu íslenskir kylfingar taka þátt í 1. stigs úrtökumóti þetta árið en einn kylfingur, Guðmundur Ágúst Kristjánsson, fer beint inn á 2. stigið.
Guðmundur Ágúst kemst beint inn á annað stigið eftir góðan árangur á Nordic Golf mótaröðinni.
Flestir af íslensku kylfingunum ákváðu að keppa á 1. stiginu í Fleesensee í Þýskalandi en alls spila sex Íslendingar þar.
Íslensku kylfingarnir verða hluti af um 800 manns sem freista þess að tryggja sér sæti á Evrópumótaröð karla í ár en alls fá 25 kylfingar í lok 3. stigs úrtökumótanna fullan þátttökurétt á mótaröð þeirra bestu. Þá fá allir þeir sem komast í gegnum niðurskurðinn í lokamótinu takmarkaðan þátttökurétt á Evrópumótaröðinni.
Samkvæmt heimasíðu mótaraðarinnar komast um 20% kylfinga áfram úr 1. stigs úrtökumótunum yfir á 2. stigið og sömu sögu er að segja um niðurskurð úr 2. stiginu yfir í þriðja og síðasta stigið.
Athygli vekur að hinn 16 ára gamli Dagbjartur Sigurbrandsson ætlar að reyna fyrir sér í ár en þessi efnilegi kylfingur varð stigameistari á mótaröð þeirra bestu hér heima í sumar eftir magnaða byrjun á tímabilinu. Það verður sérstaklega spennandi að fylgjast með framgöngu hans á stóra sviðinu í haust.
1. stigs mótin sem eru framundan hjá íslensku kylfingunum:
10.-13. september, Fleesensee, Þýskaland: Rúnar Arnórsson (áhugakylfingur), Andri Þór Björnsson, Axel Bóasson, Ragnar Már Garðarsson (áhugakylfingur), Aron Snær Júlíusson (áhugakylfingur) og Bjarki Pétursson (áhugakylfingur)
10.-13. september, Arlandastad, Svíþjóð: Aron Bergsson
17.-20. september, Nayland, England: Dagbjartur Sigurbrandsson (áhugakylfingur)
18.-21. september, Ebreichsdorf, Austurríki: Haraldur Franklín Magnús
9.-12. október, Hardelot, Frakkland: Ólafur Björn Loftsson
Rúnar Arnórsson er að keppa í útökumótunum í fyrsta skiptið.
