Úrtökumótin: Ólafur í góðum málum eftir tvo hringi
Annar hringur á 1. stigs úrtökumóti fyrir Evrópumótaröð karla fór fram í dag. Leikið er í Frakklandi og er Ólafur Björn Loftsson eini íslenski keppandinn. Hann er í góðri stöðu eftir hringina tvo, á samtals þremur höggum undir pari og situr jafn í 5. sæti.
Ólafur lék hringinn í dag á einu höggi undir pari. Á fyrri 9 holunum fékk hann tvo fugla og tvo skolla og lék þær því á parinu. Á seinni 9 holunum bættust svo við tveir fuglar og einn skolli og kom hann því í hús á 70 höggum eða einu höggi undir pari.
Skorið verður niður eftir þrjá hringi en má gera ráð fyrir að Ólafur fljúgi í gegnum niðurskurðinn ef hann heldur uppteknum hætti, þar sem hann situr jafn í 5. sæti eins og staðan er núna.
