Vel lukkað Bláa lóns mót í Grindavík

Fjölmargar konur mættu í einstaka blíðu á Húsatóftarvöll í Grindavík í gær og léku í árlegu kvennamóti Bláa lónsins. Mótið átti að fara fram í júní en var frestað vegna veðurs en þess þurfti alls ekki í gær enda dúnalogn, brakandi blíða og sólin brosti sínu breiðasta.

Það var heimakonan Steinunn Óskardóttir sem var hlutskörpust, spilaði á 40 punktum. Hafdís Hafberg úr golfklúbbnum Keili var í öðru sæti á 35 punktum og Guðrún Halldóra Gestsdóttir úr Golfklúbbnum Oddi var sömuleiðis á 35 punktum en með verri seinni níu.

Helgi Dan Steinsson er framkvæmdastjóri GG. „Þetta árlega Bláa lóns mót tókst einstaklega vel. Þegar ég mætti á völlinn um morguninn til að gera hann kláran fyrir mótið, var algert dúnalogn og þannig hélst veðrið fram yfir hádegi en þá kom smá vindkæling. Glæsilegar veitingar voru í boði Bláa lónsins fyrir og eftir mót og var kátt á hjalla fram eftir kvöldi, ég gat ekki betur séð en konurnar hafi skemmst sér hið besta,“ sagði Helgi.