Bjarki kjörinn Íþróttamaður Borgarfjarðar árið 2020

Borgnesingurinn Bjarki Pétursson var á dögunum kjörinn Íþróttamaður Borgarfjarðar annað árið í röð og í sjötta skipti á hans ferli.

Bjarki Pétursson leikur fyrir hönd Golfklúbbs Kópavogs og Garðabæjar og varð til að mynda Íslandsmeistari í höggleik síðasta sumar þar sem hann setti stórglæsilegt mótsmet. Hann var einnig Íslandsmeistari Golfklúbba með sveit GKG.

Hann gerðist atvinnumaður síðla árs 2019 og átti því að vera mikið á ferð og flugi á síðasta ári en sökum Covid-19 breyttust plön Bjarka og gat hann nánast ekkert ferðast. Hann er með fullan þátttökurétt á Nordic League mótaröðinni ásamt því að vera með takmarkaðan þátttökurétt á Áskorendamótaröðinni.

Hér að neðan má sjá umfjöllun um Bjarka en í myndbandinu er verið að kynna íþróttafólk Borgarfjarðar. Umfjöllunin um Bjarka hefst á 8:34.