Evrópumótaröð karla: MacIntyre sigraði í einvíginu
Robert MacIntyre sigraði í dag á Aphrodite Hills Cyprus einvíginu sem fór fram á Evrópumótaröð karla um helgina. MacIntyre spilaði á 7 höggum undir pari í dag sem var besti hringur dagsins.
Alls léku 19 kylfingar um sigurinn í dag í eins konar einvígi en það voru þeir 19 sem léku best á þriðja keppnisdeginum. Allir byrjuðu þeir lokadaginn á parinu og eftir þrjá fugla á síðustu fjórum holum dagsins fagnaði MacIntyre sigri á 7 höggum undir pari.
Þetta er fyrsti sigur MacIntyre á Evrópumótaröðinni en hann var nýliði ársins í fyrra.
Japaninn Masahiro Kawamura endaði í öðru sæti á 6 höggum undir pari. Spánverjinn Jorge Campillo varð svo í þriðja sæti á 5 höggum undir pari, höggi á undan þremur kylfingum.