Guðmundur lék fyrsta hringinn á 76 höggum
Guðmundur Ágúst Kristjánsson GR hóf í dag leik á Andalucia Challenge mótinu sem fer fram á Áskorendamótaröðinni í golfi. Guðmundur lék fyrsta hring mótsins á 76 höggum og er þessa stundina jafn í 75. sæti af 96 kylfingum.
Mótið er haldið á Novo Sancti Petri golfvallarsvæðinu sem margir íslenskir kylfingar kannast við á Spáni en þangað hefur verið hægt að fara í golfferðir undanfarin ár í gegnum íslenskar ferðaskrifstofur.
Guðmundur fékk alls þrjá skolla, einn tvöfaldan skolla og einn fugl á hring dagsins. Skollarnir komu á 3., 9. og 10. holu, tvöfaldi skollinn kom á 4. holunni en fuglinn kom á 17. holu og lék hann því seinni níu holurnar á parinu.
Annar hringur mótsins af fjórum fer fram á morgun, föstudag. Hér er hægt að sjá stöðuna í mótinu.
Skorkort Guðmundar á fyrsta keppnisdegi.