Guðrún leikur í Frakklandi á Evrópumótaröð kvenna
Atvinnukylfingur Guðrún Brá Björgvinsdóttir hefur á morgun leik á Jabra Ladies Open mótinu sem er hluti af Evrópumótaröð kvenna. Leikið er á Evian Resort golfsvæðinu í Frakklandi en völlurinn er notaður undir Evian Masters mótið sem er eitt af risamótunum fimm í kvennagolfinu.
Fyrstu tvo hringina leikur Guðrún með þeim Kylie Henry og Manon Gidali. Þær hefja leik klukkan 8:58 og byrja þær á sjöttu braut. Á föstudaginn hefja þær svo leik klukkan 13:43 og byrja þær þá á 15. braut.
Í síðustu viku lék Guðrún á Ladies Italian Open mótinu og var hún þá þremur höggum frá því að komast gegnum niðurskurðinn. Síðari hringur mótsins var góður og vonandi að Guðrún geti tekið upp þráðinn á morgun þaðan sem frá var horfið.
