Í beinni: B59 Hotel mótið - Hringur 2
Fyrsta mótið á stigamótaröð GSÍ, B59 Hotel mótið, hófst í gær á Garðavelli Golfklúbbsins Leynis á Akranesi.
Keppnisfyrirkomulag B59 Hotel mótsins er höggleikur en leiknir verða þrír hringir á jafn mörgum dögum. Ræst verður út alla þrjá keppnisdagana frá klukkan 8:00. Eftir annan keppnisdag verður skorið niður en 70% keppenda í bæði karla og kvennaflokki komast áfram á lokahringinn.
Í karlaflokki eru þeir Axel Bóasson úr GK og Sigurður Arnar Garðarsson úr GKG efstir og jafnir eftir fyrsta hring. Þeir komu í hús á 67 höggum eða á 5 höggum undir pari og eiga eitt högg á þá Aron Emil Gunnarsson úr GOS og Hákon Örn Magnússon úr GR.
Fyrstu ráshópar í karlaflokki eru farnir út á annan hring en efstu menn verða ræstir út kl. 11:30 í dag.
Í kvennaflokki er Heiðrún Anna Hlynsdóttir úr GOS í forystu. Hún kom í hús á 71 höggi eða á 1 höggi undir pari og á tvö högg á þær Maríu Eir Guðjónsdóttur og Berglindi Erlu Baldursdóttur en báðar eru þær úr GM.
Fyrstu ráshópar í kvennaflokki verða ræstir út laust fyrir hádegi í dag en efstu konurnar kl. 12:40.
