McIlroy í forystu fyrir lokahringinn í Kína
Þriðji hringur HSBC Champions heimsmótsins var leikinn í nótt og er það Rory McIlroy sem er kominn í forystu fyrir lokahringinn. McIlroy er höggi á undan Louis Oosthuizen sem átti besta hring dagsins.
Fyrir daginn var McIlroy höggi á eftir Matthew Fitzpatrick. Hann lék stöðugt golf í dag, fékk fimm fugla og restina pör og kom því í hús á fimm höggum undir pari, eða 67 höggum, þriðja daginn í röð. McIlroy er því samtals á 15 höggum undir pari.
Oousthuizen lék á 65 höggum í nótt, eða sjö höggum undir pari. Hann er samtals á 14 höggum undir pari, einn í öðru sæti. Fitzpatrick lék á 70 höggum og er jafn Xander Schauffele, sigurvegara síðasta árs, í þriðja sæti á 13 höggum undir pari.