Úrtökumótin: Ljóst hvar íslensku kylfingarnir spila næstu tvo daga
Annar keppnisdagur lokaúrtökumótsins fyrir Evrópumótaröð karla fór fram í dag á Lumine svæðinu á Spáni. Leikið er á tveimur völlum á svæðinu, þeim Lakes og Hills, og léku íslensku kylfingarnir allir á Lakes vellinum í dag.
Búið er að birta rástíma fyrir næstu tvo keppnisdaga og er keppendum skipt upp eftir skori fyrstu tveggja daganna.
Bjarki og Guðmundur leika þriðja hringinn á Hills vellinum og þann fjórða á Lakes vellinum. Röðin er öfug hjá Andra sem leikur á Lakes vellinum á morgun.
Eftir tvo daga af sex er Guðmundur efstur af íslenska hópnum í 22. sæti á 4 höggum undir pari. Bjarki er á þremur höggum undir pari í 40. sæti og Andri Þór er í 120. sæti á 2 höggum yfir pari.
Rástímar íslenska hópsins næstu tvo daga eru eftirfarandi:
Hringur 3:
8:10 (að íslenskum tíma): Bjarki, Hills
8:25: Andri Þór, Lakes
8:40: Guðmundur Ágúst, Hills
Hringur 4:
9:10: Bjarki, Lakes
9:20: Andri Þór, Hills
9:45: Guðmundur Ágúst, Lakes
Hér er hægt að sjá stöðuna í mótinu.
Eftir fjóra hringi verður skorið niður í mótinu og halda þá um 70 kylfingar áfram. Til þess að fá fullan keppnisrétt á Evrópumótaröðinni þurfa strákarnir okkar að enda í einu af 25 efstu sætunum að sex hringjum loknum.