Átta Íslandsmeistarar báru kistu Björgvins

Fjölmenni var við útför Björgvins Þorsteinssonar sem fram fór frá Grafarvogskirkju í gær. Björgvin lést 13. október sl. eftir veikindi sem hann hafði glímt við síðustu ár.

Séra Pálmi Matthíasson, Kylfingur og prestur í athöfninni minntist Björgvins sem átti magnaðan golfferil. Björgvin var sexfaldur Íslandsmeistari í golfi og vann sinn síðasta titil af mörgum í sumar en þá sigraði hann í flokki 65 ára og eldri í Vestmannaeyjum. Þá lék hann á 56 Íslandsmótum en á því síðasta á sínum gamla heimvelli, Jaðarsvelli í sumar. 

Pálmi fór yfir feril Björgvins í minningarorðum og sagði meðal annars að þessi einn mesti afrekskylfingur landsins hafi verið með einskæran golfáhuga fram á síðasta dag. „Hann var ekki alltaf maður margra orða en húmorinn var aldrei langt undan,“ sagði Pálmi m.a. í ræðu sinni.

Átta fyrrverandi Íslandsmeistarar báru kistu Björgvin við útförina. Meðal söngvara í útförinni var Ragnhildur Gísladóttir.