Bezuidenhout valinn kylfingur júní mánaðar á Evrópumótaröðinni
Evrópumótaröðin tilkynnti í dag hvaða kylfingur hefði verið kosinn kylfingur júní mánaðar á mótaröðinni. Valið stóð á milli þeirra Christiaan Bezuidenhout, Guido Migliozzi, Andrea Pavan og Jon Rahm en allir nema Rahm unnu mót í mánuðinum.
Það var Bezuidenhout sem hreppti hnossið með 41% atkvæða en Migliozzi kom næstur honum með 24%. Rahm fylgdi í kjölfarið og að lokum var Pavan í fjórða sæti.
Bezuidenhout fagnaði meðal annars sigri á Andalucia Masters mótinu, varð jafn í þriðja sæti á BMW International Open mótinu og hann þénaði rúmlega 576 þúsund evrur. Sigurinn kom í 57. móti sem hann tók þátt í á mótaröðinni.