Dramatík og spenna í Solheim bikarnum - allt jafnt fyrir lokadaginn

Það er gríðarlega spenna fyrir lokadaginn í Solheim bikarnum þar sem bestu golfkonur Evrópu og Bandaríkjanna eigast við í þessari stærstu golfkeppni kvenna. Staðan er jöfn, 8-8 þegar tvímenningurinn er eftir á Bernardus golvellinum í Hollandi.

Bandaríska liðið þurfti að svara fyrir sig eftir að Evrópa vann fjórmenninginn um morguninn 3-1 og leiddi með tveimur vinningum fyrir fjórboltann eftir hádegi. Jennifer Kupcho sá til þess með stórkostlegum hætti í lokaleiknum.

Kupcho var einni holu undir með tvær holur eftir ásamt Lindy Duncan gegn Céline Boutier og Carlota Ciganda. Hún setti niður fuglapútt af 30 metra færi á 17. holu áður en hún endurtók leikinn af sjö metra færi á þeirri 18, algerlega magnað. Þessir tveir fuglar í röð tryggðu eins holu sigur og þær bandarísku fögnuðu frábærum lokaspretti en þær unnu þrjá síðustu leikina í fjórboltanum.

„Ég hef aldrei séð neitt þessu líkt,“ sagði Angela Stanford, liðsstjóri Bandaríkjanna. „Þetta var risastórt. Þetta sneri gæfunni okkur í vil.“

Anna Nordqvist, liðsstjóri Evrópu, hrósaði leikmönnum sínum eftir dramatískan keppnisdag.

„Þetta er ótrúlegt pútt sem Jennifer Kupcho setti niður á 17. holu og jafnvel púttið sem hún setti niður á þeirri 18., svo það er í raun ekkert hægt að gera í því,“ sagði Nordqvist. „En þetta var frábær viðureign. Ég held að í heildina hafi þetta verið frábær dagur. Við erum jöfn fyrir morgundaginn.“

Sigur Evrópu í fjórmenningi um morguninn einkenndist af nokkrum framúrskarandi frammistöðum og sögulegum augnablikum í Solheim-bikarnum.

Mimi Rhodes og Nastasia Nadaud urðu fyrsta nýliðaparið til að vinna tvær viðureignir í einum og sama Solheim-bikarnum, eftir 4&3 sigur þeirra – stærsti sigur nýliðapars í fjórmenningi.

Leona Maguire skráði sig einnig á spjöld sögunnar og varð sá leikmaður sem hefur náð 10 sigrum í Solheim-bikarnum í fæstum viðureignum. Heildarárangur írsku stelpunnar er nú 10-3-1.

Þær bandarísku Lauren Coughlin og Alison Lee unnu stærsta sigur morgunsins þegar þær sigruðu Charley Hull og Lottie Woad 6&5. Úrslitin jöfnuðu metið fyrir stærsta sigur í sögu fjórmennings í Solheim-bikarnum og voru jafnframt stærsta tap Hull á ferli hennar í Solheim-bikarnum. Árangur Coughlin batnaði í 5-0-2, sem gefur henni 85,7 prósenta sigurhlutfall – það besta í sögu Solheim-bikarsins meðal leikmanna sem hafa spilað að minnsta kosti fimm viðureignir.

Sögulega séð hafa Bandaríkin haft yfirhöndina í einliðaleikjum, með 122,5 stig gegn 97,5 í þessu keppnisfyrirkomulagi. Þær evrópsku munu þurfa að sýna sínar bestu hliðar til að leggja þær bandarísku í tvímenningi. Það hefur gerst nokkrum sinnum en mun sjaldnar en á hinn veginn.

Eftir tvo daga af sveiflum, dramatík á lokasprettinum og metframmistöðum, mun Solheim-bikarinn ráðast í lokaumferðinni.

30 metra pútt ofan í til að jafna á 17. holu.

AN UNBELIEVABLE PUTT TO EXTEND THE MATCH FROM JENNIFER KUPCHO 🤯💥 pic.twitter.com/k6iEbXnkWT
— LPGA (@LPGA) September 12, 2026

Charley Hull fær eld hjá áhorfanda.

Englendingurinn Charley Hull er jafnan litrík og skemmtileg og vílar ekki fyrir sér að gera ýmsa hluti sem stundum vekja undrun, eins og að fá sér sígarettu úti á velli, hvað þá að fá eld hjá áhorfanda eins og hér má sjá.