Formannshjónin best á KEF mótinu í Leiru
Formannshjónin í Golfklúbbi Suðurnesja sigruðu í KEF-hjóna og paramótinu sem fram fór á Hólmsvelli í Leiru 6. júní. Alls mættu 84 keppendur til leiks í uppseldu móti sem haldið var í samstarfi við Hótel Keflavík og Diamond Suites.
Helgin hófst með fordrykk í KEF SPA þar sem þátttakendur fengu jafnframt að kynnast Vatnsneshúsinu, einu merkasta söguhúsi Reykjanesbæjar, áður en haldið var út á Hólmsvöll til leiks. Að leik loknum tók við glæsilegt borðhald þar sem verðlaun voru afhent.
„Það er eitthvað sérstakt við KEF Hjóna- og paramótið. Við hjá Golfklúbbi Suðurnesja erum stolt af því að sjá hvernig mótið hefur þróast á fáum árum. Það sem byrjaði sem skemmtileg hugmynd hefur orðið að viðburði sem margir setja hring utan um í dagatalinu sínu áður en sumarið gengur í garð.
Við viljum færa Hótel Keflavík, Diamond Suites, KEF SPA og KEF Restaurant okkar bestu þakkir fyrir samstarfið og þá metnaðarfullu umgjörð sem þau skapa í kringum mótið. Einnig viljum við þakka öllum keppendum fyrir jákvæðnina, góða andann og gleðina sem fylgdi deginum,“ segir í frétt frá GS um mótið.
Formannshjónin Svandís og Sveinn voru jöfn Eddu Guðrúnu og Jóni Jóhannssyni en voru með betri árangur á seinni níu holunum. Svo var parið í 3. sæti aðeins höggi á eftir þessum tveimur. Hörku spenna á Hólmsvelli.
Úrslit:
1. sæti – 45 punktar
Svandís Þorsteinsdóttir og Sveinn Björnsson
2. sæti – 45 punktar
Edda Guðrún Pálsdóttir og Jón Jóhannsson
3. sæti – 44 punktar
Þórey Friðrikka Guðmundsdóttir og Þorkell Þór Gunnarsson
17. sæti – 40 punktar
Þóranna Andrésdóttir og Halldór Reinhardtsson
40. sæti – 29 punktar
Jónas Halldór Haralz og Gyða Haralz Jakobsdóttir
Nándarverðlaun hlutu:
• Baldur Þórir Júlíusson
• Elínborg Sigurðardóttir
• Jón Jóhannsson
• Sólveig Björgvinsdóttir
