GR bikarinn: Gunnhildur efst eftir fyrsta daginn
Securitas mótið, þar sem keppt er um GR bikarinn, hófst í morgun á Grafarholtsvelli. Mótið er boðsmót á Eimskipsmótaröðinni þar sem nokkrir af bestu kylfingum landsins keppast um sigur.
Í kvennaflokki fór Gunnhildur Kristjánsdóttir, GK, best af stað en hún er með tveggja högga forystu á næstu kylfinga eftir fyrsta dag. Hún lék á einu höggi yfir pari eða 72 höggum.
Hringur Gunnhildar var nokkuð stöðugur en tveir fuglar og þrír skollar gerðu það að verkum að hún kom inn á höggi yfir pari.
Jafnar í öðru sæti eru þrír kylfingar, þær Ragnhildur Sigurðardóttir, Saga Traustadóttir og Berglind Björnsdóttir, allar úr Golfklúbbi Reykjavíkur. Þær léku fyrsta hringinn á þremur höggum yfir pari.
Helga Kristín Einarsdóttir, GK, er í 5. sæti á fjórum höggum yfir pari.
Alls eru leiknir þrír hringir í mótinu sem lýkur á sunnudaginn. Mótið er lokamót tímabilsins 2016-2017 á Eimskipsmótaröðinni.
Hér er hægt að sjá stöðuna í mótinu.
