GSÍ búið að framlengja við RÚV
Fram kemur á heimasiðu Golfsambands Íslands að sambandið hafi nýlega endurnýjað samning sinn við RÚV.
Samningurinn er til þriggja ára og snýr að því að RÚV haldi áfram að sýna frá Íslandsmótinu í höggleik í beinni útsendingu.
„Nýr samningur við RÚV er mikið ánægjuefni fyrir golfhreyfinguna en samstarfið hefur verið virkilega gott og metnaðarfullt undanfarin ár,“ segir Brynjar Eldon Geirsson framkvæmdastjóri GSÍ.
Íslandsmótið í höggleik fer fram hjá Golfklúbbi Mosfellsbæjar í sumar. Mótið verður haldið dagana 6.-9. ágúst og hafa þau Guðmundur Ágúst Kristjánsson GR og Guðrún Brá Björgvinsdóttir GK titil að verja.