Magnús Birgisson ráðinn til GA
Magnús Birgisson hefur verið ráðinn í starf þjálfara hjá Golfklúbbi Akureyrar í sumar. Magnús bætist þar með í hóp með þeim Stefaníu Kristínu Valgeirsdóttur og Heiðari Davíð Bragasyni sem fyrir eru hjá klúbbnum.
Á heimasíðu Golfklúbbs Akureyrar kemur eftirfarandi fram:
„Með tilkomu Magnúsar er horft til að auka þjónustu GA á öllum sviðum þjálfunar. Þannig verður lögð enn meiri áhersla á metnaðarfullt barna- og unglingastarf sem og að bjóða félögum á öllum getustigum upp á aukið framboð af námskeiðum.
Magnús er Akureyringum vel kunnugur en hann bjó hér í 10 ár og var klúbbmeistari GA árið 1983. Móðir hans er Inga Magnúsdóttir sem varð klúbbmeistari kvenna hjá GA 10 ár í röð frá 1979-1988.“
Magnús hefur störf hjá klúbbnum 1. júní og mun starfa til 1. september.