Munoz efst eftir magnaðan hring á Bell Micro
Hin spænska Azahara Munoz er efst eftir fyrsta hring á Bell Micro LPGA Classic, en hún átti nær óaðfinnanlegan hring þar sem hún lék á 65 höggum, eða sjö undir pari. Hún fékk engan skolla á hringnum, hitti allar brautir og náði öllum flötum nema einni í tilætluðum höggafjölda (GIR), en á þeirri holu fékk hún fugl eftir að hafa vippað ofaní úr glompu við flötina.
Munoz er með tveggja högga forskot á næstu konur, Cristie Kerr, Meena Lee, Janice Moodie og Hye Jung Choi. Suzann Pettersen, Eunjung Yi, Sun Young Yoo og Amanda Blumenherst koma næstar á 68 höggum.
Jiyai Shin, sem er efst á heimslistanum, lék á 70 höggum líkt og Ai Miyazato, sem hefur sigrað á þremur LPGA mótum í ár. Michelle Wie lék á 72 höggum.
Munoz var með nafntogaðri áhugakylfingum fyrir nokkrum misserum þar sem hún sigraði á lokamóti NCAA árið 2008 og á Opna breska áhugamannamótinu í fyrra.
Hún hóf eftir það leik á Evrópumótaröð kvenna og sigraði á sínu fyrsta móti, Madrid Ladies Masters, en fór í gegnum LPGA úrtökumótin í vetur.
Myndir úr safni golfsupport.nl
