PGA: Noren og Simpson efstir á Honda Classic mótinu
Það eru þeir Alex Noren og Webb Simpson sem eru efstir eftir einn hring á Honda Classic mótinu. Erfiðar aðstæður voru í gær, en þó nokkur vindur var á svæðinu, og voru aðeins 20 kylfingar sem léku á undir pari.
Noren og Simpson léku á 66 höggum, eða fjórum höggum undir pari, og eru með eins höggs forystu. Þeir léku mjög svipað golf í gær og fengu þeir báðir til að mynda fimm fugla, einn skolla og restina pör.
Fimm kylfingar eru jafnir í þriðja sæti á þremur höggum undir pari. Það eru þeir Morgan Hoffmann, Justin Thomas, Daniel Berger, Mackenzie Hughes og Louis Oosthuizen.
Tiger Woods er á meðal keppenda. Hann lék á 70 höggum og er eftir daginn jafn í 21. sæti.
