Kristján og Nína klúbbmeistarar GM árið 2019
Kristján Þór Einarsson og Nína Björk Geirsdóttir urðu á laugardaginn klúbbmeistarar Golfklúbbs Mosfellsbæjar þegar lokadagur Meistaramóts GM fór fram.
Í kvennaflokki réðust úrslitin á lokaholunum. Arna Rún Kristjánsdóttir var með eins höggs forystu eftir 16 holur en hún hafði þá fengið fugl á þeirri holu til að taka forystuna. Nína svaraði því með fugli á 17. holu og því var allt jafnt fyrir lokaholu mótsins.
Á 18. holunni, sem er rúmlega 130 metra löng par 3 hola, fékk svo Nína par á meðan Arna fékk skolla og því fagnaði Nína eins höggs sigri.
Þetta er í þriðja skiptið frá því að Golfklúbbur Mosfellsbæjar var stofnaður í lok árs 2014 sem Nína Björk verður klúbbmeistari. Síðast vann hún árið 2016.
Í karlaflokki var ögn minni spenna en þar sigraði Kristján Þór með fimm högga mun eftir fjóra hringi undir pari. Kristján lék samtals á 11 höggum undir pari í mótinu og varð að lokum fimm höggum á undan Ragnari Má Ríkarðssyni. Alls léku fjórir kylfingar undir pari í meistaraflokki karla þetta árið.
Þetta er fjórða árið í röð sem Kristján Þór verður klúbbmeistari GM í karlaflokki.