Lowry vill enda árið í efsta sæti

Írinn Shane Lowry vonast til að enda árið á Evrópumótaröð karla á góðum nótum nú þegar einungis þrjú mót eru eftir af tímabilinu. Lowry er á meðal keppenda á Turkish Airlines mótinu sem fer fram í vikunni og er í leit að sínum sjötta titli á mótaröðinni.

Fyrir mót vikunnar er Lowry einungis um 700 stigum á eftir Bernd Wiesberger sem er efstur á stigalista mótaraðarinnar en Lowry sigraði bæði á Abu Dhabi HSBC mótinu snemma á árinu og Opna mótinu í sumar. Lowry setur stefnuna á efsta sætið í lok tímabils.

„Markmiðið mitt næstu vikurnar er að spila eins vel og ég get. Það væri frábært ef ég ætti möguleika á því að vinna Race to Dubai þegar 18 holur eru eftir í lokamótinu. Að verða númer eitt í Evrópu væri mjög sérstakt og myndi gera árið enn betra.

Það væri rjóminn á kökuna. Ég ætla að gera mitt allra besta en verð ekki of vonsvikinn ef það tekst ekki. Ég hef átt gott ár."