McIlroy kylfingur ársins á PGA mótaröðinni í þriðja sinn
PGA mótaröðin tilynnti í dag að Rory McIlroy væri kylfingur ársins 2019 en það voru kylfingar með keppnisrétt á mótaröðinni sem tóku þátt í kosningunni.
McIlroy hefur nú verið kosinn kylfingur ársins á PGA mótaröðinni þrisvar (2012, 2014 og 2019) en verðlaunin kallast Jack Nicklaus Award.
Hinn þrítugi McIlroy vann FedEx keppnina í ár í annað skiptið á ferlinum eftir sigur á Players meistaramótinu, Opna kanadíska og á lokamótinu sjálfu, TOUR Championship.
Valið stóð aðallega á milli McIlroy og Brooks Koepka sem sigraði einnig á 3 mótum en líklega hefur McIlroy haft betur vegna stöðugleikans sem hann sýndi. McIlroy var til að mynda með lægsta meðalskorið á mótaröðinni og þá endaði hann 14 sinnum meðal 10 efstu í mótum ársins.