Vallarmet hjá Wiesberger og Wattel
Það voru frábærar aðstæður á lokadegi Porsche European Open mótsins í dag ólíkt því sem var fyrstu þrjá dagana. Fyrstu dagar mótsins einkenndust af töluverðum vind og rigningu með köflum og voru skorin eftir því. Fyrir lokadaginn voru efstu menn á níu höggum undir par og aðeins 37 hringir komnir á 69 höggum eða betur.
Á lokaeginum voru aftur á móti 28 kylfingar sem léku á 69 höggum eða betur. Bestu hringirnir komu samt frá Bernd Wiesberger og Romain Wattel. Þeir félagar léku saman í dag og virtust nærast á velgengi hvors annars. Því þeir gerðu sér lítið fyrir og komu báðir í hús á 64 höggum sem er nýtt vallarmet á Green Eagle vellinum.
Wiesberger fékk skolla á annarri holu dagsins en eftir það lék hann frábært golf, fékk níu fugla og restina pör. Wattel tapaði ekki höggi á hringnum í dag. Hann fékk sex fugla á fyrstu 13 holunum, síðan komu fjögur pör áður en að hann endaði á erni á lokaholunni. Wiesberger endaði einn í fimmta sæti á meðan Wattel endaði einn í sjötta sæti.
Romain Wattel.