Fréttir

PGA: McIlroy hélt að hann hefði fengið tvö högg í víti
Rory McIlroy.
Ísak Jasonarson
Ísak Jasonarson skrifar
laugardaginn 10. ágúst 2019 kl. 10:43

PGA: McIlroy hélt að hann hefði fengið tvö högg í víti

Þegar Rory McIlroy lék síðustu fjórar holurnar á öðrum hringnum á Northern Trust mótinu hélt hann að klaufaleg mistök á 14. holu hefðu kostað hann tvö högg.

McIlroy var í glompu á holunni og ætlaði að fjarlægja það sem hann hélt að væri steinn en var í raun sandur. Þegar McIlroy áttaði sig á því lét hann dómara á svæðinu vita af atvikinu og fékk fyrir það tvö högg í víti.

McIlroy sætti sig við dóminn og kláraði hringinn áður en hann fékk að vita dómurinn hefði verið dreginn til baka. Rökin fyrir því voru þau að McIlroy hefði í raun ekki bætt leguna í glompunni þegar hann snerti sandinn óvart.

„Ég er tveimur höggum nær forystunni en ég hélt,“ sagði McIlroy, sem er á 9 höggum undir pari í mótinu, þremur höggum á eftir Dustin Johnson. „Í stað þess að vera 5 höggum á eftir er ég þremur höggum á eftir sem er mikill munur.“

Líklega hefði enginn tekið eftir því þegar McIlroy snerti sandinn ef McIlroy hefði ekki látið dómara vita af atvikinu.

„Ástæðan fyrir því að ég náði í einhvern var að ég vil ekki hafa neitt á samviskunni,“ sagði McIlroy. „Ég spila leikinn heiðarlega og ég get sagt það án alls vafa að ég bætti ekki leguna. Ég hélt einfaldlega að þetta væri steinn, sem þetta var ekki.“