Rúnar undir pari á fyrsta hring St Andrews Links Trophy
Rúnar Arnórsson, GK, hóf í dag leik á einu sterkasta áhugamannamóti ársins, St. Andrews Links Trophy. Skor keppenda var gríðarlega gott á fyrsta keppnisdegi en leikið var við góðar aðstæður í Skotlandi.
Rúnar lék fyrsta hringinn á höggi undir pari og er jafn í 59. sæti af 144 keppendum.
Alls fékk Rúnar fjóra fugla og þrjá skolla á hring dagsins sem fór fram á Jubilee golfvellinum.
Leiknar eru 72 holur í mótinu sem lýkur á sunnudaginn.
Matty Lamb og Thomas Plumb, báðir frá Englandi, eru jafnir í forystu í mótinu á 8 höggum undir pari.
Meðal þeirra sem hafa keppt á St. Andrews Links Trophy frá stofnun mótsins árið 1989 eru Ernie Els, Lee Westwood, Trevor Immelman, Geoff Ogilvy, Padraig Harrington, Justin Rose, Rory McIlroy og Francesco Molinari.
